我又發埋啲奇怪嘅夢．．．所以有好多嘢未必合理．．．希望大家諒解！
另外發現篇文會太長，決定拆件上！
故事純屬虛構，如有雷同就…我唔識講喇！
為堅定不移並全面準確貫徹「一國兩制」、「港人治港」、高度自治的方針，維護國家安全，防範、制止和懲治與香港特別行政區有關的分裂國家、顛覆國家政權、組織實施恐怖活動和勾結外國或者境外勢力危害國家安全等犯罪，保持香港特別行政區的繁榮和穩定，保障香港特別行政區居民的合法權益，根據中華人民共和國憲法、中華人民共和國香港特別行政區基本法和全國人民代表大會關於建立健全香港特別行政區維護國家安全的法律制度和執行機制的決定，制定本法。
——《中華人民共和國香港特別行政區維護國家安全法》第一章，第一節
有一日，我收到一封信——啡色信封，左上角印住「香港警務處」同「HONG KONG POLICE」嘅字樣。仲要註明係私人密件！
我望一望個信封上面個label——的確係我嘅姓名同地址．．．
「告票都唔駛印『私人密件』嘛？」我心諗。
喺香港，我連一部電單車都afford唔到，何來有交通告票呀？
我隨手喺櫃度搵一把刀鎅開信封，揚一揚封信嚟睇。
標題寫：「自首通知書」
Eh?! 「自首」？我犯咗咩事呀？！
我繼續睇落去。
敬啟者：
犯人姓名: ＸＸＸ 香港身份証編號：K20XXXX(X)
你已於20XX年X月X日觸犯《中華人民共和國香港特別行政區維護國家安全法》第三章第二節第二十三條：
「任何人煽動、協助、教唆、以金錢或者其他財物資助他人實施本法第二十二條規定的犯罪的，即屬犯罪。情節嚴重的，處五年以上十年以下有期徒刑；情節較輕的，處五年以下有期徒刑、拘役或者管制。」
現在，香港警務處處長根據香港特別行政區維持國家安全委員會的要求，向你發出此通知書。你必須於20XX年Y月Y日上午九時至中午十二時之間前往香港銅鑼灣道148號報到自首，接受拘留。報到時必須攜帶此通知書或香港身分証，以作身分驗明。
此程序無需任何律師或法律顧問陪同。
如果你不在指定日期及時間之間報到自首。香港警務處處長會按照香港特別行政區維持國家安全委員會的要求，對你發出通輯令。
ＳＳＳ
香港警務處處長
咩話？！我犯咗國安法？！
屌你老味！連「閣下」都唔識寫．．．啲老散話就係「毅進仔」，盲字都唔識多一隻。啲officer應該都有大學底，真係唔識寫公函㗎？
雖然寫係「自首通知書」，但係個tone根本係「欶令自首書」。
唉！
不過，呢個香港，真係令人好沮喪。
我放棄之前喺加拿大軍部晉升做officer嘅機會，打算返嚟做電視電影——呢個係我由細到大嘅夢想。好可惜係我有才華，但係唔識人。每次寫求職信去電視台都石沉大海——有時都會收到email話收到求職信，後來寄完都無哂聲氣。
為咗謀生，馬死落地行喇！因為以前讀書除咗軍隊都有做兼職食Q，於是喺度考個食Q牌，做返老本行！寄咗封求職信俾依家嘅公司，佢見我工作經驗夠，試用咗三個月就俾我做個主任仔。得過且過喇！
工餘時間，我會上吓網。有時會寫吓文（好似依家咁），做吓圖諷刺一下時局。但係自問一直都好小心．．．我點樣觸犯呢一條呢？
突然之間諗起：有人將我做嘅圖印成海報貼街！我見到時仲掩住嘴笑出來！
唉！算喇！我認命喇！咁都俾個あくま政府捉鳩到！「十八年後又一條好漢」！梁天琦都受緊，我諗我捱得到嘅。
於是，我用「為自己預備身後事」嘅心情同公司辭職。
公司都幾冷淡——因為我會有案底，出返嚟時個保安牌應該會suspense緊，唔可以即時做返保安。而且，我sense到佢哋之後都唔會再請返我。
不過，佢數就同我計得清清楚楚：人工、假期、補時咩都補哂俾我。我收到支票之後即刻入銀行——好彩張支票過到數！總算有啲渣拿。
我即刻將銀行嘅錢提哂出嚟，除咗留大約二三萬蚊港幣自用之前，其他就換哂加元出銀行本票，然後將張銀行本票收喺屋企一個好安全嘅地方。
喺指定自首時間之前，我盡情玩，盡情食，盡情去做自己想做嘅嘢——真係雞都叫埋！不過件雞身上同間房陣味好古怪，都有少少反胃。呢啲嘢真係試一次就好喇，第時要打飛機都係搵返啲日本四仔算喇！
有個死黨奇怪我作為電影迷而未睇過《教父》系列，於是我買哂三集煲哂佢。另外，我去戲院睇哂早午晚幾場，場場不同。
反而，我無咩心情揸筆寫嘢——坐監之後應該有啲時間寫嘢卦．．．
但係，我喺之前一晚，坐喺書檯，好認真地拎起筆，喺疊原稿紙上寫嘢。
真心一句：我唔甘心！明明話我嘅人權係唔會被侵犯㗎嘛！點解依家要強迫我自首？
封信其中一句：「此程序無需任何律師或法律顧問陪同。」其實令我有啲擔心。
我按你「要求」嚟自首。咁自首之後會點呢？佢哋會唔會俾我見律師？會唔會將我送上法庭接受審訴㗎？
香港法律係「假定無罪」喎！但係封信抬頭已經係標明我係一個「犯」——基本上已經係認定我有罪。
突然之間，我胡思亂想——萬一我去到報到，負責「整理」嘅人二話不說就拖我去打靶．．．又或者，秘秘密密咁送我返上去，將我囚禁喺啲無人知嘅中國監獄或「再教育」營呢？到時就叫天不應，叫地不聞！
寫到盡興，我就收筆上床，瞓到自然醒先算！
到咗嗰日朝頭早，我差唔多九點幾近十點先瞓醒——算早！
我洗頭沖涼，著最舊嘅衫，最爛嘅波鞋——即使放監出嚟要丟都唔可惜。不過，對波鞋都同我行遍天下… 要同佢分離都有啲唔捨得。
不過無辦法喇！
仲有，戴返一隻cheap cheap指針錶——睇時間！
上路之前梗係要做隻飽鬼，否則邊有力去披枷帶鎖呢？之前都諗「最後早餐」應該食咩：諗過要食最豪嘅嘢，散盡身上之財！
但係到最後一刻，我反而係去咗一間河粉舖頭叫咗碗魚皮餃墨魚丸河同一碟炸魚皮。以前喺外國生活係無魚皮餃食（或者係無咁好食），但係一返到嚟又唔係成日買來食。
唉！到最後都係犯賤！
食飽之後，我揸住一罐大紅牛去搭電車，慢慢搭去天后。嚟到香港堅持住返港島嘅最大原因就係電車。除咗平時放工，我放假時係會搭電車周圍去——最鍾意去筲箕灣掃街。
我唔喺皇仁書院個站落車，而喺摩頓臺，即中央圖書館，近新都戲院落車——係喎！依家無咗新都戲院噃！嗰度已經做咗教會。
新都戲院同埋原本喺另一頭——指定自首地點隔離，依家已經拆咗嘅百樂戲院係天后呢帶嘅兩間大戲院。新都專播新藝城嘅港產片，百樂就專播荷李活片——因為以前做教書嘅老竇會有學界嘅飛，所以喺呢度睇迪士尼卡通最多！不過兩間戲院都有播唔係專門播嘅戲：當年我哥就帶我去新都，兩個人坐一個位睇《異形續集》。另外，我喺百樂睇《聖誕快樂》，《上海之夜》同《刀馬旦》。
可惜，物是人非，幢嘢嘅功能都變到七鳩彩！
我覺得，我識嘅香港離我越來越遠。
我未正式回流之前返過香港一次。嗰時咁啱就聖誕節，我坐電車去行街時塞耳仔聽由一位加拿大歌手唱嘅聖誕歌。佢有一首歌嘅歌詞係咁：
I found a place across the sea,
She is glorious and free,
Where I found love and I’ve never felt alone.
聽到呢段時，我覺得我有啲deja vu。嗰一刻好神奇，竟然問自己究竟邊度係「我嘅地方」！
聽到去「Merry Christmas! I‘m coming home tonight」時，我更加有「自己喺香港係『過客』」嘅感覺。
嗰時真是好鬼迷惘——呢個係我決定回流試可唔可以生活嘅理由之一。
估唔到，我依家就因為喺我嘅出身地行駛我嘅權利而被迫自首。諗起都悲吓！
我慢慢沿住摩頓臺行去銅鑼灣道。過咗浣紗街，我特登走入去禮賢里。
因為，我嘅family church就喺呢度。
我屋企父母兩邊都係幾代信教。BB仔時候，屋企人就抱我去聖壇領洗；到咗十八歲就行堅信禮。信仰路上起起伏伏。雖然仍然有去崇拜，但係現實發生嘅種種都令我對信仰有啲失望。
明明仆街阿共喺中國拆緊十字架，逼害緊有信仰嘅人。點解啲牧師長老執事個個聲都唔聲，反而要為啲仆街政要（仲要係唔信神嘅）代禱？
明明個火就嚟燒到埋身，啲信眾不單可以「視而不見」，仲要話好，話「咁樣個社會先可以安定落嚟」喎。
我屌你老母！
突然之間有啲尿急，想搵個地方揸水。費時一陣無機會痾，要瀨出嚟。
我望一望平時崇拜開來方便老人家嘅側門，希望佢有開。
我都算好彩：因為幼稚園要返學，一陣又有人嚟查經，所以我可以撞入去，借喺地下，以前係兒童樂園，依家變咗團契室嘅廁所。
出嚟之後，我望一望間房，更令我有更強嘅「物是人非」嘅感覺。
真心，第日出嚟真係唔知間教堂會唔會喺度。但係為咗唔令自己有留戀，我即刻行出去。
望一望手錶，依家係十一點搭八。依我腳程，廿分鐘去自首綽綽有餘。
終於．．．我企喺香港銅鑼灣道148號門前。
呢度，之前係一間叫「維景」嘅酒店。見到比較多嘅係中國客，都有一啲外國客。另外，呢度都中旅社去中國嘅旅行團嘅集合點——據我觀察。
「酒店」再之前係咩我已經無印象；不過佢隔離間標榜綠色嘅餐廳我就好有印象——喺我細個時候係一間士多。當年7-11或其他便利店未真係「梗有一間喺你左近」時，想就咁買包零食，買支汽水，就係要幫襯士多。士多舖頭上面個架會掛好多玩具同零食。唔記得自己有無扭過買嘢玩，不過零食汽水一定有幫襯過。
依家士多已經絕跡於市區，與此同時逝去嘅一種純樸嘅風味。
我望一望手錶：十一點搭十。啱啱好！
我唞一大啖氣，再一次諗到一入呢個門口之後就成為一個犯人．．．我真係想喊。
我望一望個入口。好奇怪——門口係唔見有讀卡機！喺加拿大，我多數都係喺聯邦政府大樓或辦公室返工。最怪嘅辦公室係一間喺Downtown一間酒店嘅地面，屬於Correction Service Canada，專門做假釋事宜嘅辦公室——Office隔離就係一間酒吧！
喺我作為食Q嘅理解當中，即使係一間office仔都會有一個讀卡機．．．
好鬼不設防．．．呢吓覺得真係恐怖！
就喺呢個時候，我眼尾睄到一個女仔：佢無點化妝，啖啡色嘅長長秀髮又有啲波浪同令人心悅嘅光澤，加上佢嘅精緻臉孔；令我喺一秒之間心動。
真係好想溝佢！
我再睄一睄佢身上嘅衫：比較樸素，好平凡嘅薰衣草色連身裙，一對白色有一啲踭嘅鞋。對鞋比較殘舊——同我對波鞋有得比。
佢肩膀上掛住一個奶白色，應該係真皮嘅手袋。同對鞋一樣，都有啲舊舊地。
佢憂心忡忡望住個門口，好似猶豫緊好唔好入去。
相信佢同我一樣，都係「要求」自首。
呢個情況，我諗起《雙城記》入面嘅Sydney Carton。佢喺等上前往斷頭臺嘅馬車時識到一個做裁縫嘅少女。少女以為佢係Charles Darney，但係一埋身嘅時候就知道佢唔係Charles。少女好佩服Sydney嘅勇氣同無私犧牲。佢就請Sydney陪佢，而Sydney答應佢。
雖然我對眼前位靚女由憐生愛，但係我無時間好似Sydney咁長篇大論去鼓勵或安慰佢。
淨得用行動去做！
我諗我唔似Sydney——我寧願我上斷頭臺先，都唔想睇見我喺生命最後一刻嘅同路人死喺我之前。
於是，我一鼓作氣，昂起頭，帶著一身傲氣行入去！
我開門入去。大概喺我行上電梯嘅時候，我感到身後一陣風——應該係個女仔都推門入埋嚟。
我淨係望住前面，唔諗其他嘢。
喺電梯盡頭，我見到一個接待處。嗰度坐咗一個紥咗一條馬尾、化咗一個似淡，但係感覺庸俗嘅妝、嘴唇搽咗一隻比較鮮紅（目測係Max Factor）嘅唇膏、一睇就知係外省人嘅後生女仔。佢著住一套深藍色套裝，裡面係白色女裝恤衫；好executive look——意料之中嘅事。
喺我行近嘅時候，個「接待員」望上嚟，好似已經知道我要做咩。
我喺我左手邊嘅前褲袋拎出首「自首通知書」，放喺櫃台，輕輕講：「我嚟自首㗎。」
「你俾張身份証俾我核對資料。」佢啲廣東話唔咸唔淡，超級礙耳！
我俾我張身分證俾佢睇。佢核對好之後就俾返張証俾我，然後佢拎起一個對講機，用字圓正腔嘅普通話講：「一個男的。」
我企到定一定，唔敢望後面，亦唔希望個女神行埋嚟。無幾耐，有兩個大約廿幾歲，陸軍裝，著住黑色西裝嘅高大男人——佢哋比香港班毅進仔大隻好多——行過嚟我身邊。
呢兩件無哩表情，啲氣勢都幾Meathead（按：對加拿大憲兵［Military Police］嘅叫法，笑鳩佢哋頭大無腦，得返肌肉）吓！
「為咗我哋同你嘅人身安全，我哋需要搜你身。」都係超級礙耳嘅有口音廣東話：「將你雙手放喺頭度。」
我沉住道氣，跟住嗰個人嘅指示將手指扣埋一齊，放喺頭度——亦都調節自己嘅呼吸，令自己唔好咁緊張。嗰兩個人二言不說就由我膊頭開始拍拍摸摸。佢哋拍到去我腰時，好刻意拍同摸多幾吓——有一個仲揸到我春袋，搞到我差少少起「反應」！
未入「赤柱」就已經俾人摸來摸去．．．真係要唱定《黑獄斷腸歌》呀？
「後面有一個女的。待我們回去之後，你才叫人來吧！」
「好的！」
跟住，喺我右手邊嘅「肉頭」將我嘅右手用力拉落嚟，拉到我身後。呢個時候，我覺得有一條硬膠條套到去我手腕——嘿！用塑膠手扣！正路啊！
左手邊嘅「肉頭」將我嘅左手拉落嚟，套落去個塑膠手扣。
右手索緊個手扣之後，兩個「肉頭」 一手捉住我手臂，一手搭住我膊頭，好有技巧咁推我行。即使我無反抗，我感覺我已經無自己郁嘅自由。
我望一望電梯口，見到女神。佢有望我，仍然都係嗰個憂忡嘅神情。我輕輕咁同佢笑一笑，不過好快，我個頭「被迫」向前望。
Most of the power of authoritarianism is freely given. In time like these, individuals think ahead about what a more repressive government will want, and then offer themselves without being asked. A citizen who adapts in this way is teaching power what it can do.
Timothy Snyder “On Tyranny: Twenty Lessons From the Twentieth Century"
創作無間遊 