唔好駁講古佬，上一回講明係唔會有章法。
兩個堅似「武警」嘅「肉頭」押我去搭lift，停定之後就「推」我出去，然後入去一間房——兩條友全程都係搭住我膊頭，捉住我手臂，一啲都無鬆懈過！
如果我依家唔係被套上塑膠手扣，而係被五花大綁，頸上掛住一個寫咗我個名——仲要打咗個大紅交叉——嘅大名牌，俾呢件兩件「肉頭」扯住頭髮，頭要向前，我真係以為自己去緊打靶！
或者因為以前係酒店，以及呢個係一個臨時嘅地方，所以都唔算令人壓迫感。
令人有壓迫感係我身邊嗰兩隻「肉頭」——因為之前我已經prep好我自己，我某程度上都應付到。
「肉頭」帶我去一間房：嗰間房都有窗，但係拉咗窗簾。裡面有一張凳，一張大木檯。我見到喺木檯旁邊有一部攝影機加三腳架。另外，我隱約喺遠少少嘅一個角落見到一部單反相機同三腳架。
有一個大約四十幾歲，黑黑實實，都係陸軍裝，著一套深灰色西裝嘅男人——目測係一個職業軍人——坐喺檯度。同樣都係軍人，呢隻比我嘅戰友差天共地：成個人硬巴巴，古肅到不得了．．．真係一隻「戰」狼。
「肉頭」近乎「拎」我去張凳度，壓我坐落去。
之後，佢哋放開——終於放手喇！
我前面隻「戰狼」喺度望檯面嘅文件——應該係我嘅file卦。過咗無耐，佢用好銳利目光望住我。
「你係ＸＸＸ？」仍然係啲仆街唔咸唔淡嘅廣東話！
「係。」
「198X年X月X日出世？」
「係。」
「依家喺G4S保安公司擔任保安主任？」
「係。」
我好想講：「屌你老母，你啲廣東話好撚難聽！」
跟住，佢拎起一張標題《只有自卑到零點的人才會肆無忌憚去拿著武器瞄準手無吋鐵的人民》嘅海報，主題大人物就是嗰件揸著支霰彈槍嘅「光頭警長」，配埋其他差佬揸槍指住市民嘅相。
我自己以前係做Weapon Technician（按：雖然後備軍都有Weapon Technician，但作用不大。如果想以此入職，多數人都係入正規軍。），好清楚啲武器可以做到嘅傷害。記得當時睇到隻禿驢拎住支霰彈槍好似好撚威時候，我真係一句Holy Motherfucker嗌出嚟！
即使佢哋之後點拍片洗底都好，佢哋喺一般市民心目中已經形象破產。
所以我做嗰張海報去恥笑佢哋。
「呢張圖，我哋由Facebook提供嘅資料，追查到呢一張海報係由一個叫Masayoshi Mogami嘅用戶發出。而我哋作出深入調查之後，知道Masayoshi Mogami係你。」
他停一停，然後用一個兇悍眼神望住我：「呢張圖係唔係你做嘅？」
我無錯！圖係我做，不過我唔打算喺呢度認。
我唔出聲，亦無咩表示。
「係唔係你做㗎？」佢再問我一聲——個tone好兇狠。
我仍然都係唔出聲。喺我側跟嘅「肉頭」似乎想揪我起身——其中一件已經揸住拳頭想打我。
但係，隻「戰狼」微微咁擰擰頭。
「我俾多一次機會啊．．．」隻「戰狼」繼續講：「我哋喺呢個戶口搵到其他抵毀我國政府同領導人嘅圖！」
我「哼」咗一聲：「《國安法》之中嘅第四條話『香港特別行政區維護國家安全應當尊重和保障人權』，所以我依家保持緘默。無律師喺度，我唔會講任何嘢。」
我呢句說話應該激到隻死「賤狗」出煙——佢個樣已經係show哂出來！
我諗住兩個「肉頭」應該會係即刻毆我幾嘢。
不過，隻「戰狼」擰擰頭。
「別在這臭老九身上浪費時間！」佢喺度吠：「解開手銬，去拍照！」
兩件「肉頭」的我起身，秤我去之前見到嘅相機加三腳架——嗰時，我先望到貼牆上嘅用來度高嘅大紙尺。相機旁邊有一檯——我見到檯面有一個monitor。
右手邊嘅「肉頭」用哂兩隻手去「壓制」我嘅「人身自由」，而左手邊嘅「肉頭」行去相樹機嗰邊。佢拎支箱頭筆，望住個monitor抄嘢——應該係我嘅個人資料。抄完之後，佢對住佢「拍乸」點點頭。然後，我感到有一啲凍同尖嘅嘢插喺我手腕同膠手扣之間。
「卡擦！」
佢cut開個手扣，將我推去牆度。
「企直啲！」
另一個「肉頭」揸住塊板，質俾我。
「你睇吓張牌個名同身份証號碼啱唔啱。啱就企喺度映相！」
我望一望塊板——身分證號碼係啱，但係個名寫簡體字。
「個名寫錯啊！」
個「肉頭」望一望個mon，然後過嚟望塊板。
「啱啊！」
「簡體字啊！」
「呢啲叫『規範字』！依家所有人都係用呢套字㗎喇！」
「我之前喺街度仲係見到街度都仲係用緊正體字喎！」我講：「你差唔多同我改咗姓！」
「擦」
下一秒，我個肚俾個「肉頭」用伸縮警棍打咗一下——好重手！
「唔想再捱打就唔好嘥我哋時間！」然後佢行返去相機嗰度。
一直喺我身邊嘅「肉頭」即刻撳我埋牆——佢啲無情力令我差啲腦震盪！
「同你哋呢班顛覆國家嘅人渣講廣東話已經好俾面喇！」
於是，我揸住塊用殘體字寫我名嘅板，好似人哋入冊咁映硬照——映完左邊，映右邊，最後映正面。
一直喺我身邊嘅「肉頭」即刻拎走個板。映相嗰個「肉頭」拎件鮮粉紅色嘅背心過來，質俾我。
「著住佢！」
知道無得反抗，我就著起件鮮粉紅色背心。映相嘅「肉頭」將一個好似行李標籤穿喺一個左心口嘅布扣——因為都係鮮粉紅色，所以好難睇得出。
「將雙手放上頭度！」
我又一次將雙手擺喺頭度。唔知幾時，有多一個「肉頭」過嚟——我隱約聽到一啲鐵鍊聲。
之前一直喺我身邊，限制我活動嘅「肉頭」踎低少少。呢個時候，我覺得有啲凍冰冰嘅嘢圍住我條腰。
「卡擦！」應該係一把鎖。
我嘅右手又一次俾「肉頭」拉落嚟——呢次係拉去我的前面。
「卡擦」一聲，我隻右手已經扣喺我腰嗰度。跟住。個「肉頭」將我左手拉落嚟，扣埋喺腰度。
之後，個「肉頭」踎低。我同時望落去——見到佢開始將腳鐐扣喺腳眼度！
真係「披枷戴鎖」啊！
由收到封《自首通知書》開始，我就一直用嬉笑嘅態度去講「披枷戴鎖」呢四個字。雖然知道上「孖葉」就少不免——因為已經俾人當係犯㗎喇；不過覺得最多都係「孖葉」啫。
依家唔係俾人當係「犯」——而係「極度重犯」！
不過，香港執法當局都試過對被告「落重本」——以前有一個鄉事派立法局議員叫戴展華，佢選到入局之後被人揭發用假文件去得到律師資格；於是被人告「偽造文件」同「冒充律師」，好似有坐監嘅。後尾仲破咗產！當時電視新聞播佢第一次上法庭時，就係戴條「鍊」，對手就鎖喺兩邊——好多人都覺得小題大做。
而喺加拿大，呢種「侍候」係真係留俾重犯——我曾經喺渥太華一間醫院見過警察押犯去睇醫生，個犯就係戴哂手扣腳鐐去行喇！
我究竟做咗咩而有咁嘅「侍候」？如果我有打劫殺人放火，強姦良家婦女就話啫！
我望一望副腳鐐——條鍊係啱啱好俾我行到，不過幅度一定唔可以係平時咁樣。
見到咁樣，個心唔酸係呃人嘅。
我昂起個頭，即時見到有一個黑色布袋笠落嚟！嚟都嚟唔切反應！
呢一刻，我先真正知驚！
班「肉頭」無浪費一分一秒：喺我「眼前一黑」無耐之後，我感覺到有兩個好大力嘅人——應該係之前嗰兩個「肉頭」——推我向前行。
由呢一刻開始，我成個人已經完全喪失所有自由——除咗實際上嘅「束縛」之外，我嘅「生理導航系統」係熄咗九成：我唔可以用我嘅眼去「睇」我周圍嘅一切。另外，我唔可以用我嘅腳步去計算時間同距離。
只有一樣嘢佢哋可以拎走我嘅——就係我嘅「心神」！
的確，我嘅身體基於「本能」喺度回應「失去自由」嘅「恐懼」——係啊！我係震緊㗎！不過我聽到啲鐵鍊嘅聲。我利用呢個去mask我我嘅「冷靜」，希望可以另外搵方法去猜度周圍環境。
仲有：我係俾人「拖行」多過「自己行」——唔係我唔想自己行，而係覺得班「狗」好似趕時間，要趕我去一個地方（應該係一個集合點）咁，所以唔理我行唔行到，就一味咁拖我向前行。
兩件「肉頭」一路推住我行，行到一個點，就停落嚟。之後，我哋再行前啲；然後我覺得我俾人轉，面向相反方向——應該係搭lift。
呢個時候，我個身已經唔係好震。押送我嘅兩個「肉頭」（應該都係先前嗰兩個）喺度傾歇。
「看來這傢伙挺硬淨…」
「的確，現在都沒有抖了。之前有幾個不是在尿得一褲子都是！」
的確，我聞到一陣尿味。呢個令我意識我唔係搭緊之前嗰間lift。
「之前說這傢伙是保安主任…他哪兒像？」
「我看過這兒的保安，大多數都是老伯或是大媽，要求不高。相信這狗養的是特別的保安服務。」
我握到個拳頭緊一緊——某程度上，我係嬲到爆。
我知道我即使無「披枷戴鎖」未必打得贏佢哋，不過我然都好打柒呢兩隻死狗！假假地我都當過兵！將我同普通阿伯師奶比？你無撚嘢嘛？
嗰一刻，我都覺得自己退得太早！應該應承去做埋officer先退！
於是，我開始要自己唔好再震喇。兩隻死狗就唔再繼續講。
我哋應該企咗無幾耐——而我感覺到我哋係落緊嘅——㗎lift就停咗。
跟住——而我唔感到意外——兩件「肉頭」大力推我行出去。
我知道呢一個時候就係我「搞對抗」嘅時機。
喺呢度，我先講一講一嘅我以前新兵訓練時做過嘅一個操練：除咗sit-up、push-up、chin-up、跑步呢啲「普通嘢」之外，訓練之中有一個鍛鍊係要你挨喺牆度坐「無影凳」——都可以話係一種「紮馬」。即使依家退咗役兼回流返香港，我有時喺office無聊都會做吓嚟鍛鍊。有啲人見到係笑我傻——只有好少數嘅人知我做咩。
估唔到平時呢啲俾人笑「戇鳩」嘅鍛鍊喺呢個時候用得著！
我喺佢哋推咗我行幾步（我係感覺到出lift之後)之後，就企咗度唔郁，等佢哋推我。
我嘅「唔行」係幾有技巧：絕對唔係「發軟蹄」嘅「行唔到」，但係又唔係「堅定反抗」嘅「鬥力」；而係好似一個用哂電嘅機械人咁停喺度。
兩個「肉頭」都唔知我搞咩，係咁一味推同拉我向前．．．
不過佢哋唔係幾郁到我。
「操你媽！走吧！」
「剛才他還是自己走路的！」
佢哋繼續拉我向前——不過我「老樹盤根」，任佢哋點推點拉，佢哋只可以拉得郁我上半身，但係拉唔到我行前。
「聽」住佢哋行搏老命要拉我行前都係一件好過癮嘅事。
我忍笑忍得好辛苦，不過又覺得咁樣耍佢哋又好好玩．．．都有少少得意忘形咗。
本來，佢哋係貓，我係老鼠。
依家，作為老鼠嘅我掉返轉頭去撚貓．．．個場景應該係好搞笑。
「嚓！嚓！嚓！嚓！」
我聽到左手邊有伸縮棍——應該係好唔耐煩。
好喇，玩夠喇！
喺件柒頭要打落嚟嘅時候，我郁一郁去前。
件柒頭都唔係打我唔到——最多都係個圓頭尖打到我膝頭側。
傷就唔係好傷，不過都感覺到痛㗎！
兩件柒頭繼續推我行。無耐之後，我聽到「卡嚓」一聲，感覺到兩條柒頭推我轉彎．．．
我哋再轉多一個彎，然後兩件柒頭繼續推我向前行。
我諗我哋係入咗去一間房。唔出奇！酒店有conference room㗎嘛！只不過，我無辦法推斷間房有多大、裡面有幾多人、幾多係男、幾多係女．．．
其實我更加關心嘅係大約個幾鐘頭之前令我心動嘅女仔入咗嚟未．．．
不過佢比我遲去登記，佢應該仲係俾班柒頭審緊．．．應該未喺呢間房。
我向前「推進」咗好一陣，然後俾人轉咗四十五度角，壓落去坐落去一張凳。
跟住，我感覺到有一對手喺我扣喺腰嘅手撩開——感覺上好似扣多一樣嘢喺條腰度．．．
「卡擦！」
係一個鎖．．．
我某程度上後悔無留意佢哋用咩手斗扣同埋點樣扣——如果我有留意一下，我會具體想像啲狗依家鎖啲咩喺我度。
不過，咁又唔代表我唔知佢哋鎖咩落我度：我嘅educated guess係一條鐵鍊——將我同我之前嗰個人扣埋一齊。
嘩！真係好似Shawshank Redemption咁樣對待我哋？大撚你個佬！無律師、無被提上法庭、無機會為自己辯護、無機會查辨明證據、未有一個陪審團判定有罪，未有一個法官俾一個刑期．．．我就咁俾人當係重犯，係絕對唔甘心㗎！
我仲可以做咩去反抗？
呢一段時間．．．老實，比等死仲難過——至少你知道你跟著係去死。
但係，依家係唔知要等幾耐，同埋之後去邊．．．
最攞命嘅係個黑色布袋：同口罩一樣，你呼一吓，啲熱會烘返去塊臉——尤其是對於我呢啲四眼佬，基金上係折磨。
但係，呢個唔同口罩嘅係：最主要係你睇唔到你身邊嘅嘢——即使你模模糊糊聽到啲聲，聞返你自己嘅口臭；你都會感到好真實嘅恐懼。
個黑色布袋已經你內心製造一個囚室，將你囚喺自己嘅恐懼之中！
我坐定咗之後，間房無咩動靜——之前嘅女神．．．佢應該就入嚟卦？
就喺我個心最攞攞孿嘅時候，我隱約聽到一啲鐵鍊聲——我即刻閤埋眼，專心去聽聲。（係啊！我學沙加啊！）
可能係因為地毯問題，腳步聲比較難聽得出係咩人。但係，細心少少去聽同感覺．．．比較輕盈，唔似男人或者粗豪女人嘅「重」，然後我隱約聽到一啲金屬撞擊聲——同埋鎖嘅開同鎖嘅聲．．．
「起身！」
一種好自然嘅反應，我即刻起身。
「男向右轉，女向左轉！」
感覺唔到有人反抗或起慢咗身。
或者大家真係認命．．．
「香港加油！」
估唔到有人夠膽叫出來！
即刻有人上去「教訓」：「你說甚麼？」
「英德納雄耐爾～～～～就一定要實現！」
我用行力去唱呢一句《國際歌》，作為我嘅反抗。
「唔准唱！」我聽同感到有人衝過來——下一刻，我個肚捱咗一棍。
「別打了！要趕時間！」
無幾耐之後，有一道蠻力將我扯向前。
即使我幾想反抗都好．．．面對呢個地獄嘅引力，我顯得好無助。
創作無間遊 